"Мени уурдап кетишти" деп жакындарын алдап койгон кыз Орусиядан табылды

Москва шаарынан бир нече айдан бери жакындары менен байланышпай калган кыз табылды. Бул тууралуу Ички иштер министрлигинин басма сөз кызматы билдирди.

Маалыматка ылайык, жыл башында Ички иштер министрлигинин Орусиядагы өкүлчүлүгүнө 53 жаштагы Таластын тургуну Ж.О. аттуу аял 18 жаштагы Т.Б. аттуу кызын табууга көмөк көрсөтүүнү суранып кайрылган. Ж.О. арызында кызы 2018-жылдын октябрь айында Орусияга иштегени кеткенин жана ушул жылдын март айынан бери байланышпай калганын айткан.

"11-июнда Ж.О. кыргыз диаспорасынын өкүлүнүн коштоосунда Ички иштер министрлигинин Орусиядагы өкүлчүлүгүнө келип, кызы тарабынан жөнөтүлгөн билдирүүлөрдү көрсөткөн. Билдирүүдө кызы белгисиз жайда бирөөлөр күч менен кармап турганын айткан.

Бул факт боюнча ИИМдин өкүлчүлүгү Орусиянын аймактык Ички иштер бөлүмү менен биргеликте иликтөө иштерин жүргүзүп, натыйжада 17-июнда дайынсыз жоголгон Т.Б. Москва шаарынан табылды.

Т.Б. өзүнүн жазган түшүнүк катында Баткен облусунда туулган 19 жаштагы Орусиянын жараны менен чогуу жашап жаткандыгын, алардын баш кошуусуна ата-энелери каршы болгондуктан байланышпай койгондугун айтты. Мындан сырткары, туугандары кайра-кайра тынчын албашы үчүн "белгисиз адамдар күч менен кармап турушат" деп алдап койгонун жана апасы Москвага чейин издеп келет деп ойлобогонун кошумчалады", - деп айтылат маалыматта.

Белгилүү болгондой, дайыны билингенден кийин кыз өз эрки менен Москва шаарында калган. Ал эми апасы 18-июнда Кыргыз өлкөсүнө сапар алды. ИИМдин өкүлчүлүгү тарабынан Т.Б.га түшүндүрүү иштери жүргүзүлүп, туугандары менен бат-баттан байланышып туруу сунушталды.