Бишкекте Шанхай кызматташтык уюмунун саммити учурунда милиция кызматкери кафеден балта уурдап кеткен (видео)

Бишкекте өткөн Шанхай кызматташтык уюмунун саммити учурунда шаардын ВДНХ аймагында коомдук тартипти көзөмөлдөп турган Октябрь РИИБинин кызматкери, милициянын майору Н.К. кафелердин биринен балта уурдаган. Бул тууралуу жергиликтүү басылмалар жазып чыгышты.

Маалыматка ылайык, видеобайкоодон милиция кызматкери кафенин аймагына кирип, эч ким жок экенин билген соң балтаны алып атайын кийиминин жеңине салып кеткен.

Белгилүү болгондой, кафенин кожоюну Октябрь РИИБине караштуу №4 милиция бөлүмүнө кайрылып, уурулук жасаган милициянын майоруна чара көрүүнү, уурдалган буюмду кайтарып берүүсүн сураган. Бөлүмдүн башчысы окуяга чара көрүүнүн ордуна жарандын кайрылуусун жоопсуз калтырган.

Бишкек ШИИББинин маалымат кызматы аталган факты боюнча маалымат такталып жатканын билдиришти.