Жалал-Абадда милиция кызматкерлери бүтүрүүчүлөр аттестат алган күндөрү күчөтүлгөн тартипте иштейт

Жалал-Абад ОИИБинин кызматкерлери 22-24-июнь күндөрү бүтүрүүчүлөргө аттестаттар берилгенине байланыштуу күчөтүлгөн тартипте кызмат өтөшөт. Бул тууралуу облустук милициядан билдиришти.

Маалыматка ылайык, аталган күндөрү мектеп бүтүрүүчүлөрүнүн жайкы эс алуу уюштуруп, тоо коюнунда көңүл ачуусуна жол берилбейт. Ошондой эле кымбат баалуу унаалар менен ар кайсы жакты кыдыруусун болтурбоо максатында жол кыймылынын коопсуздугун камсыздоо кызматы менен “Шумкар” атайын багыттагы полку биргеликте мобилдик топторду түзүп, трассаны, ички көчөлөрдү тыкыр көзөмөлгө алышат.

Бүтүрүүчүлөрдүн коопсуздугун камсыздоо багытында милиция тарабынан ар түрдүү түшүндүрүү иш-чаралары жер-жерлерде өткөрүлүүдө. Ар кандай кырсыктардын алдын алуу максатында ата-энелер өз балдарына кам көрүп, алардын кайда жүргөндүгүн көзөмөлгө алып, иш-чараларды мектептин айланасында гана өткөрүүнү эскертишүүдө.