УКМК орун жетишсиз деп экс-мэрлер Кулматов менен Ибраимовду СИЗО-1ге которууну сунуштады

Бүгүн, 21-июнда Бишкек шаарынын Ленин райондук сотунда экс-мэрлер Кубанычбек Кулматов жана Албек Ибраимовго козголгон кылмыш иши боюнча соттук отуруму улантылууда. Соттук отурумда УКМКнын каты окулду.

Катта айыпталуучулар Кубанычбек Кулматов менен Албек Ибраимовду СИЗО-1ге которуу сунушу бар. Сунушта УКМКнын убактылуу кармоочу жайында орун жетишсиз экени жазылган.

Бул сунушка айыпталуучу Кубанычбек Кулматовдун жактоочусу Сергей Слесарев каршы экенин билдирди.

Окуянын чоо-жайына кайрылсак:

Кубанычбек Кулматовго карата 2018-жылдын май айында "коррупция" беренеси боюнча кылмыш иши козголуп, июнь айында камакка алынган. Ал Бишкек шаарынын мэри болуп турган кезде Калыс-Ордо конушундагы мектеп жана бала бакчага бөлүнгөн акчаны мыйзамсыз колдонгон деп айыпталууда.

Албек Ибраимовго карата 2018-жылдын май айында “ишенип берилген мүлктү ыйгарып алуу же жок кылуу” беренеси боюнча кылмыш иши козголуп, бул иш экс-мэрдин “Дастан” ишканасын жетектеп турган мезгилге байланыштуу экендиги айтылган. Июль айында ал ушул эле кылмыш ишинин негизинде камакка алынган.

Кийинчерээк Ибраимовго карата “коррупция” беренеси боюнча жаңы айып угузулган. Анда ал Бишкек шаарынын түштүк аймагында жайгашкан муниципалдык жер тилкелерин мыйзамсыз сатууга айыпталууда. Ушул жылдын 6-мартынан тартып Кулматов менен Ибраимовдун иштери бириктирилип, сотто карала башталды. Эки экс-мэрдин ишине байланыштуу жалпысынан 14 адамга айып коюлган.