Азиз Батукаев абактан бошотулганда бийликтин жооптуу кызматтарында кимдер турган? Кимдер камакка алынды? (инфографика)

Азиз Батукаевдин абактан бошотулушунун жана анын өлкөдөн сырткары чыгып кетүүсүнүн шарттарын иликтөө боюнча убактылуу депутаттык комиссиянын ишинин жыйынтыктары жөнүндө токтом:

1. Батукаевдин абак жайынан бошотулушун жана анын өлкөдөн чыгып кетүүсүнүн шарттарын иликтөө маселеси боюнча убактылуу депутаттык комиссиянын төрагасы - Жогорку Кеңештин депутаты Болот Шердин маалыматы эске алынсын.
2. Премьер-министрдин начар иши: камактагы Батукаевди жазаны андан ары өтөөдөн бошотуу жана эркиндигинен ажыратылган жерден бошотуу боюнча жүйөлөштүргөн бөлүктө көрсөтүлгөн аткаруу бийлигинин мамлекеттик органдарынын айрым жетекчилеринин бүтүмгө киришине мүмкүнчүлүк берген аткаруу бийлигинин мамлекеттик органдарынын иштерин так жетекчиликке алуу жана координациялоо жоктугу көрсөтүлсүн.
3. Конституциянын 74-беренесинин 4-бөлүгүнүн 6-пунктуна ылайык, акыйкатчы Турсунбек Акунду ээлеген кызмат ордунан мөөнөтүнөн мурда бошотуу жөнүндө маселе мыйзамда белгиленген тартипте демилгеленсин.
4. "Кыргыз Республикасынын судьяларынын статусу жөнүндө" мыйзамынын 26-беренесинин 4-бөлүгүнө ылайык, Нарын шаардык сотунун төрагасы Жапар Эрматовду жергиликтүү соттун судьясы кызмат ордунан мөөнөтүнөн мурда бошотуу жөнүндө маселени кароо жана президентке сунуш киргизүү судьялар кеңешине сунушталсын.
5. Премьер-министр 10 күндүк мөөнөттө төмөндөгү маселелерди карасын:

- "Кыргыз Республикасынын Өкмөтү жөнүндө" мыйзамынын 13-беренесинин 6-бөлүгүнө ылайык, вице-премьер-министр Шамиль Атахановду, ички иштер министри Абдулда Суранчиевди, саламаттыкты сактоо министри Динара Сагинбаеваны ээлеген кызмат ордунан бошотуу тууралуу сунуштаманы президентке киргизүү жөнүндө;

- "Кыргыз Республикасынын Өкмөтү жөнүндө" мыйзамынын 18-беренесинин 2-бөлүгүнүн 15-пунктуна ылайык, ЖАМКнын төрагасы Зарылбек Рысалиевди ээлеген кызмат ордунан бошотуу тууралуу;

- Ички иштер министринин орун басары Фурхат Усеновду, Саламаттыкты сактоо министрлигинин гематология боюнча кыргыз илимий изилдөө борборунун директорунун орун басары Эмил Макимбетовду, ЖАМКнын төрагасынын кеңешчиси Калыбек Качкыналиевди, ЖАМКнын медициналык-санитардык камсыз кылууну уюштуруу башкармалыгынын начальниги Акылбек Асановду, №24 (Нарын шаарындагы 4-СИЗО) мекемесинин башчысы Кубанычбек Касымалиевди, ушул эле мекеменин башчысынын орун басарынын милдетин аткаруучусу Тилек Абылгазиевди ээлеген кызмат ордунан бошотуу тууралуу.

6. Конституциянын 64-беренесинин 4-бөлүгүнүн 1-пунктуна ылайык, Башкы прокурорго төмөндөгүлөр сунушталсын:

- Президентке Башкы прокурордун орун басары Людмила Усманованы ээлеген кызмат ордунан бошотуу тууралуу сунуш киргизүү;

- түзөтүү мекемелериндеги мыйзамдуулукту көзөмөлдөө боюнча прокурор Майрамбек Акматалиевдин, ошондой эле түзөтүү мекемелеринде мыйзамдуулукту көзөмөлдөө боюнча прокурордун жардамчысы Кубат Жуматаевдин жоопкерчиликтери жөнүндө маселени кароо.

7. Башкы прокуратурага:

- камактагы Батукаевди жазаны андан ары өтөөдөн мыйзамсыз жана негизсиз бошотууга жана анын өлкөдөн чыгып кетүүсүн камсыз кылууга катыштыгы бар кызмат адамдарына карата юридикалык баа берүү жөнүндө маселени иликтесин жана карасын;

- ушул токтом кабыл алынган күндөн тартып эки айдан кеч эмес мөөнөттө ушул пункттун экинчи абзацынын аткарылышынын жүрүшү жөнүндө Жогорку Кеңеште маалымат берсин.