Мас атасы балдарын сабаган окуя. Эненин күйөөсүнө эч кандай доосу жок

Чүй облусунун Сокулук районундагы аймактык ооруканага сабалып, оор абалда түшкөн 3 жана 5 жаштагы бир туугандардын окуясы боюнча облустук милиция билдирүү таратты.

Маалыматка ылайык, Сокулук РИИБине 3 жана 5 жаштагы балдар денесинен ар кандай жаракат алып ооруканага түшкөнү кабарланган. Жерине ыкчам-тергөө тобу барып, балдардын энесин суракка алышкан. Ал 21-июнь күнү саат 20:00 чамасында кошуналарынан "күйөөң балдарыңды сабап жатат" деген кабарды угуп, үйүнө келгенде балдарынын бири жерде, экинчиси анын жанында отурганын көргөн.

"Үйгө келсем жолдошум мас абалында балдарымды сабаган экен. Ошол замат "Тез жардам" кызматын чакыртып, балдарды бейтапканага алып бардым", - деп айтып берген эки баланын энеси.

"26 жаштагы эне алгачкы суракта эле күйөөсүнө эч кандай доосу жок экенин айтып, арыз жазуудан баш тарткан. Бирок бул факты Кылмыштардын жана жоруктарын бирдиктүү реестрине катталып, 144-берене ("уруп-согуп кыйноо") менен сотко чейинки өндүрүшкө алынган. Ал эми балдардын 26 жаштагы Ч.К. аттуу атасы күнөөнү моюнуна алган эмес. Учурда бардык тийиштүү экспертизалар дайындалып, тергөө иши башталды" , - деп билдирди басма сөз кызматы.

Буга чейин эки баласы атасы тарабынан сабалганын балдардын энеси SUPER.KG порталына билдирген.