Стамбул шаарынын мэрин шайлоодо оппозиция өкүлү кайрадан жеңишке жетти

Элдик-республикалык оппозициялык партиянын атынан талапкер Экрем Имамоглу Стамбул шаарынын мэрин шайлоодо кайрадан жеңишке жетти. Шайлоо 23-июнда өттү.

Өлкөнүн БШКсынын маалыматы боюнча бюллетендердин 98 пайызы текшерилип, ага шайлоого катышкандардын 53,9 пайызы добуш беришти.

Башкаруучу Акыйкаттык жана өнүгүү партиясынан талапкер, Түркиянын президенти Режеп Тайип Эрдогандын жакын адамы аталган Бинали Йылдырым 45,2 пайыз добуш алды.

Ал Имамоглуну жеңиши менен куттуктап, "атаандашымды куттуктайм жана ага ийгилик каалайм. Шайлоо өлкөбүздө демократия бар экенин көрсөттү. Имамоглу Стамбул шаарын башкарып, элге жана шаар тургундарына бүт аракетин жумшап, кызмат кылышын каалайм" деди.

31-мартта Түркияда муниципалдык шайлоо өткөн. Көпчүлүк аймактарда башкаруучу партиянын өкүлдөрү жеңишке жеткен. Бирок Стамбул, Измир жана Анкара шаарларында оппозициялык күчтөр жеңген. Башкаруучу партиянын өкүлдөрү шайлоо мыйзам бузуу менен өткөнүн айтып чыгышканда бир айдан кийин БШК шайлоонун жыйынтыгын жокко чыгарып, кайрадан мэрди шайлоо күнүн 23-июнга белгилеген.