Ошто мигранттарды реабилитациялоо борбору ачылды

Ошто мигранттарды реабилитациялоо борбору ачылды. Аталган борбордо мигранттарга укуктары, жумушка орношуу жана алар барып иштеген өлкөлөрдүн мыйзамдары тууралуу кеңири маалымат, кеп-кеңештер берилет. Бул тууралуу Ош шаарындагы "Улыбка" коомдук фондунан билдиришти.

Маалыматка ылайык, долбоордун максаты кулчулуктун алдын алуу жана адам сатууга каршы күрөшүү менен элдин жакырчылыктан чыгышына көмөктөшүү.

Жарандарга жардам берүү борборлору Ош облусунун Кара-Суу районундагы Кызыл-Кыштак жана Жалал-Абад облусунун Сузак айыл өкмөттөрүндө сыноо иретинде ишке кирди. Бул борборлордун ишинен жакынкы жана алыскы чет өлкөлөргө эмгек миграциясына камынып жаткан жарандар, миграцияда жүрүп укугу бузулгандар ошондой эле кулчулукка кабылгандар кайрылып, пайдалана алышат.