Бишкекте окууда артыкчылык көрсөткөн бүтүрүүчүлөргө "Алтын тамга" аттестаты тапшырылды

24-июнда өлкөдөгү мектептерде билим алгандыгы тууралуу аттестаттарды тапшыруу аземи болду.

Бишкекте артыкчылык менен орто мектепти бүтүргөндөрдү сыйлоо салтанатында бүтүрүүчүлөргө өзгөчө үлгүдөгү "Алтын тамга" аттестаты берилди. Бул тууралуу мэриянын басма сөз кызматы билдирди.

"Жалпы 6297 бүтүрүүчүнүн 56сына артыкчылык аттестаты тапшырылды. Алардын арасында шаардык жана республикалык олимпиада жеңүүчүлөрү, ар түрдүү сынактарда сыйлыктарга ээ болгондор бар. Бүтүрүүчүлөргө маанилүү документти Бишкектин вице-мэри Татьяна Кузнецова, Бишкек шаардык кеңешинин депутаты Адиса Имангазиева, район башчылары тапшырышты", - деп айтылат маалыматта.

Сыйлоо аземинен кийин концерттик программа тартууланды. 2018-2019-окуу жылынын жыйынтыгына ылайык 16 окуучу "Алтын тамга" аттестатын алса, Жалпы республикалык тестирлөөнүн жыйынтыгы боюнча 4 окуучу артыкчылык аттестатын алды.