Кытай Кыргыз өлкөсүнүн ШКУну өткөрүүдө короткон чыгымдарын өз моюнуна алат

Бишкекте 13-14-июнь күндөрү Шанхай кызматташтык уюмунун мамлекет башчыларынын саммитине кеткен чыгымдарды Кытай мамлекети төлөйт. Бул тууралуу билдирүүнү Экономика министрлигинин басма сөз кызматы таратты.

Маалыматка ылайык, ШКУну уюштуруу иштерине кетирген 6 миллион 760 миң доллар чыгымды Кытай тарап төлөп бермей болду. Тиешелүү документке Кытай менен Кыргыз тарап кол койду.

Буга чейин кыргыз милициялары Кытай тараптан 300 миллион сомго жакын акча каражатына техника менен камсыздалган. Орусия Кыргыз тарапка 66 автоунаа берген. Ал эми ШКУга мүчө мамлекеттер 450 миллион сом каражат бөлүп, бул сумма мамлекеттик резиденцияны оңдоп-түзөөгө багытталган.

ШКУга даярдануу үчүн шаардык кызматтар 73 миллион 679 миң сом коротушкан. Каражаттын көп бөлүгү шаарды жашылдандырууга, тазалоого жана жолдорду оңдоого сарпталган. Мындан "Бишкекасфальтсервиске" 40 миллион сом, "Бишкекгорсветке" 12 миллион 556 миң, "Тазалыкка" 6 миллион, "Бишкекзеленхозго" 6 миллион 500 миң сом бөлүнгөн.

Мындан сырткары Биринчи Май районуна 3 миллион 675 миң сом, Ленин районуна 2 миллион , Октябрь районуна 1 миллион 334 миң сом, Свердлов районуна 686 миң сом бөлүнгөн.