Казакстанда кесиптеши менен сүрөткө түшкөнү үчүн сабалган ливиялык жумушчу кечирим сурады

Казакстандын Атырау облусунда Тенгиз кениндеги заводдо кесиптеши менен сүрөткө түшүп, ур-токмокко алынган жумушчу казак элинен кечирим сурады. Мындай маалыматты чет элдик басылмалар жазып чыгышты.

Сабалган жумушчу Ели Дауд кечирим сураганын видеого тартып, аны социалдык тармакка жүктөгөн.

"Биринчиден, акимчиликтен, президенттен жана жалпы казак элинен кечирим сурайм. Болгону кесиптешимди сүрөткө тартып койгом. Жаман нерсе жасайын деген эмесмин. Экинчиден, Казакстанда 2 жылдан бери иштейм. Бул жылдар аралыгында эч кимди капа кылгым келген эмес. Мени кечириңиздер", - деген ал өз кайрылуусунда.

29-июнда Казакстандын Атырау облусунда Тенгиз кениндеги заводдо жаңжал чыккан. Ага ливиялык жумушчу Ели Дауддун рациянын антеннасы анын артында турган казак улутундагы кыздын оозунун деңгээлинде жайгашкан жана сүрөткө каткырып күлгөн быйтыкча кошулганы себеп болгон. Жергиликтүү жумушчулар бул сүрөттү кемсинтүү деп эсептеп, араб кызматкерлерин сабап салышкан.