Иркутск облусунда суу ташкынынан улам 12 адам каза болуп, 9 адам дайынсыз болууда

Орусиянын Иркутск облусунда суу ташкынынан улам 12 адам каза болуп, 9 адам дайынсыз болууда. Бул тууралуу бүгүн, 1-июлда орусиялык басылмалар жазып чыгышты.

Маалыматка ылайык, буга чейин Иркутск облусунда тынбай жааган жаандан улам жергиликтүү дарыяларда суу нугунан чыгып өзгөчө кырдаал жарыяланган болчу.

"Суу ташкынынан улам 6 миң 700 турак жай, мектеп, оорукана жана социалдык мекемелер суу алдында калды. Жалпысынан табигый кырсыктын кесепетинен 751 адам жабыркап, 153 адам ооруканага жеткирилген. Учурда өзгөчө кырдаал 6 районго киргизилди, жабыркагандарга гуманитардык жардам чогултулуп, тиешелүү ар тараптуу жардамдар көрсөтүлүүдө", - деп айтылат маалыматта.

Буга чейин жалпы облус боюнча 10 көпүрө бузулуп, 18 айыл менен байланыш үзүлгөнү айтылган. Нөшөрлөп жааган жамгырдан улам Уда, Ия, Ока жана Бирюс дарыялары нугунан чыгып кеткен.