Америка Кубогу: Аргентина финалсыз калды. Бразилия-Аргентина эсеп 2:0

Америка Кубогунун жарым финалында Бразилиянын курама командасы Аргентина курамасын 2:0 эсебинде жеңип алды.

Кызыктуу оюндун жүрүшүнүн 19-мүнөтүндө Габриэл Жезус Бразилиянын эсебине алгачкы голду жаза алды. Ал эми Роберто Фирмино 71-мүнөттө эсеп санын 2:0 кылды. Жыйынтыгында Бразилия курамасы финалга жолдомо алды.

Финалдык беттеште Бразилия Чили-Перу оюнунда жеңүүчү аталган команда менен кез келет.

15-июнда Бразилияда Түштүк Америка футбол конфедерациясы тарабынан уюштурулган Америка Кубогунун тайпалык баскычы старт алган.

Мелдешке Түштүк Америка континентиндеги 10 өлкө жана конок катары чакырылган Азия футболдук конфедерациясынын курамындагы Япония жана Катар өлкөлөрү, жалпы 12 команда катышууда.

Азыркы тапта Америка Кубогунун ээси - Чили курамасы. Ал эми эң көп жеңүүчү аталган команда Уругвай курама командасы, алар 15 жолу жеңишке ээ болушкан.