Бишкектин борборунда сабалган чет элдик жаран комада жатат (видео)

Кечээ, 2-июлда социалдык тармактарда Бишкектин ортосунда жайгашкан "Айчүрөк" соода борборунун аймагында сабалган чет элдик жарандын видеосу тараган. Анда жерде кыймылсыз жаткан жаранга көптөгөн адамдар жардам көрсөтүп, суу куюп жатканын көрүүгө болот.

"Окуя саат 16:30дар чамасында болгон, биздин мекендешибиз чет элдик жаранды сабап салды. Алган жаракатынан улам ал комага түшүп калды, жакындары менен байланышуу мүмкүн болбой жатат", - деп жазылат маалыматта.

Аталган видео боюнча Бишкек шаардык ички иштер башкы башкармалыгына кайрылганыбызда, териштирүү иштери жүрүп жатканын айтып, төмөндөгүлөрдү билдиришти:

"2-июль күнү саат 17:30да Улуттук госпиталдан 102 кызматына 1985-жылы туулган Т.А. аттуу жаран оор абалда түшкөнүн билдиришкен. Аталган факт Кылмыштардын жана жоруктардын бирдиктүү реестрине катталып, сотко чейинки өндүрүшкө алынды. Жабырлануучу эсине келе элек", - деп билдирди басма сөз кызматы.

Алдын ала маалыматтар боюнча, сабалган жаран Бишкектеги тил үйрөтүүчү мектептердин биринин директору Т.Абубакар экени айтылууда.