Бишкекте Нигериянын жаранын сабаганга шектелген 22 жаштагы бала кармалды

Бишкек шаарынын борборундагы "Айчүрөк" соода борборунун аймагында Нигериянын жаранын сабаганга шектелген жаран кармалды. Бул тууралуу бүгүн, 3-июлда Бишкек ШИИББинин басма сөз кызматынан билдиришти.

"Жүргүзүлгөн ыкчам аракеттердин алкагында чет элдик жаранды сабаган деген шек менен 1997-жылы туулган К.Э. аттуу Ысык-Көл облусунун тургуну кармалды. Кылмышка шектүү убактылуу кармоочу жайга киргизилди. Учурда окуянын чоо-жайы аныкталууда", - деп айтылат маалыматта.

Кечээ, 2-июлда социалдык тармактарда Бишкектин ортосунда жайгашкан "Айчүрөк" соода борборунун аймагында сабалган чет элдик жарандын видеосу тараган. Сабалган жаран Бишкектеги тил үйрөтүүчү мектептердин биринин директору 1985-жылы туулган Т. Абубакар экени айтылган.

Бул окуядан улам, өкмөт башчы чуулуу окуяга күнөөлүүнү тез арада кармоого ыкчам иш-чараларды жүргүзүп, мыйзам жоопкерчилигине тартуу керек экенин белгиледи. Ал эми Нигерия жаранынын ден соолугун өзгөчө көзөмөлгө алып, медициналык жардам көрсөтүүнү Саламаттыкты сактоо министрлигине тапшырган.