Нигериялык жаран каза болгон окуядан кийин "Айчүрөк" соода борборунун администрациясы эскертүү таратты

Нигериялык жаран Али Тижжани Абубакар каза болгон окуядан кийин "Айчүрөк" соода борборунун администрациясы соода орундарын ижарага алгандарга эскертүү таратты. Анда соода борбордун айланасында күч колдонуу менен жаңжал чыкса катаал чаралар көрүлөрү жөнүндө жазылган. Билдирүүнү колдонуучулар сүрөткө тартып, интернетке жүктөштү.

"5-июлдан тартып кардарларга карата күч колдонуп же кадыр-баркына шек келтирүүчү сөздөрдү айткандарга чара көрүлөт. Администрация ижара келишимин жокко чыгарууга чейин барат. Бөлүмдөрдө сатуучулардын санын кыскартышы мүмкүн", - деп жазылат билдирүүдө.

2-июлда социалдык тармактарда "Айчүрөк" соода борборунун аймагында сабалган чет элдик жарандын видеосу тараган. Сабалган жаран Бишкектеги Cambridge School билим берүү борборунун директору 1985-жылы туулган Али Тижжани Абубакар экени айтылган. Ал Бишкекте 20 жылдан бери жашаганы белгилүү болгон. Анын сөөгү 5-июлда Арча-Бешик конушуна жакын жайгашкан көрүстөндө жерге берилди.

Бул окуядан улам өкмөт башчы чуулуу окуяга күнөөлүүнү тез арада кармоого ыкчам иш-чараларды жүргүзүп, мыйзам жоопкерчилигине тартуу керек экенин белгилеген. Кылмышка шектелип 22 жаштагы Ысык-Көл облусунун тургуну кармалган.