Нигериялык жарандын өлүмүнө шектүү адам телефон аркылуу ким менен сүйлөшкөнү аныкталды

Бишкек шаардык милиция кызматы нигериялык жарандын өлүмүнө шектелип жаткан адам менен телефон аркылуу сүйлөшкөн окуянын күбөсүн аныктады. Бул тууралуу милициянын басма сөз кызматынан билдиришти.

Маалыматка ылайык, окуя учурунда шектүү социалдык тармакта түз эфир аркылуу Жалал-Абад облусунун 1994-жылкы С.К. аттуу тургуну менен сүйлөшкөнү аныкталган.

Өз көрсөтмөсүндө С.К. кылмышка шектүү К.Э. менен көп убакыттан бери дос экенин айткан.

"2-июль күнү кылмышка шектүү саат 16:00 чамасында социалдык тармактагы баракчасы аркылуу түз эфирде отуруп, ГУМ "Чынар" соода борборунун сырткы көрүнүшүн көрсөтүп жаткан. Түз эфирде аны менен бирге Москва шаарында эмгектенген достору дагы бар болчу. Алар кылмышка шектүүнү айлананы жана соода борборду көрсөтүүсүн суранып жатышкан. Бир маалда сөгүнгөн сөздөрдү уктум. Ал эми К.Э.ден эмне болгонун сурасам, ал чет элдик жаран анын дарегине жаман сөздөрдү айтып жатканын билдирди. Мен болсо ага жолун улай берүүсүн жана ал сөздөргө маани бербей эле коюшун айттым. Ошентип ал "Айчүрөк" соода борборуна жетти. Ал учурда мурун эле сүйлөп жаткан үн кайрадан угулуп ал "сен эмне мени видеого тартып жатасың" деп орой сүйлөдү. Ага К.Э. "эс алчы, мен сени тарткан жокмун" деген жообун кайтарды. Буга да болбой белгисиз адам жаман сөздөрдү айтканда, К.Э. аны чаап жиберди, ошол маалда түз эфир өчүп калды. Мен ишенимдүү түрдө К.Э. Нигериянын жаранына эч кандай терс, адамдык сапатына шек келтирчү сөздөрдү айткан эмес деп айта алам", - деген көрсөтмө берди деп билдиришти милициядан.

Азыркы тапта сотко чейинки иликтөө иштери уланып жатат.