Түркияда каза болгон Кыргыз жараны боюнча элчилик менен Тышкы иштер министрлиги маалымат тарата элек

Түркиянын Алания шаарында тапанчанын огунан Кыргыз жигити каза болгон. Бул окуя боюнча Түркиядагы Кыргыз мамлекетинин элчилигине байланышканыбызда, Чыңгыз аттуу мырза маалыматты Тышкы иштер министрлиги бере турганын айтты.

"Биз топтолгон маалыматтардын баарын Кыргыз Республикасынын Тышкы иштер министрлигине өткөрүп беребиз. Расмий маалыматты министрликтен ала аласыздар", - дейт.

Ал эми Тышкы иштер министрлигинин басма сөз катчысы Уланбек Дыйканбаев азырынча эч кандай маалымат жок экенин айтат.

"Биз аталган окуя боюнча элчиликке суроо жибергенбиз. Азырынча маалыматты күтүп жатабыз" деди маалымат кызматынан.

Бир ай мурда Орок айылында чыккан жаңжалга Түркиянын Кыргыз мамлекетиндеги элчиси Женгиз Камил Фырат жетип барган. Кыргыз коомчулугу түрк элчисинин бул кадамын кескин сынга алышканы менен Түркиянын Тышкы иштер министрлиги Женгиз Камил Фыратты өзүнүн милдеттерин аткарган деп жооп кайтарган.

Кыргыз өлкөсүнүн Түркиядагы элчиси болуп Кубанычбек Өмүралиев иштейт. Ал бул кызматка ушул жылдын март айында дайындалган.