Ысык-Көлдө 3 адамдын өмүрүн алган кырсыкка кабылган унаалардын биринде шаардык кеңештин депутаты болгону айтылууда

Ысык-Көлдүн Чолпон-Ата шаарындагы 3 адамдын өмүрүн алган жол кырсыгына кабылган унаалардын биринде Бишкек шаардык кеңешинде "Республика-Ата Журт" фракциясынан депутат Темирлан Токобеков болгон деген маалымат тарады. Ал кырсыктан кийин Бишкектеги ооруканалардын бирине жеткирилген деп айтылууда.

Азырынча жогорудагы маалыматты тактоо үчүн Темирлан Токобековго байланышуу мүмкүн болбой жатат.

Буга чейин ИИМдин жол кыймылынын коопсуздугун камсыздоо башкы башкармалыгы билдиргендей, 7-июлда Балыкчы-Ананьево-Каракол жолундагы жол кырсыгынан BMW Х7 жана Lexus ES 300 үлгүсүндөгү унаалар сүзүшкөн. Бул мекеме BMW Х7 унаасынын айдоочусу тууралуу гана маалымат берип, ал эми жүргүнчүсү тууралуу берген эмес.

"BMW Х7 унаасын 1996-жылы туулган Х.Э. аттуу бала башкарып бара жаткан. Ал эми Lexus ES 300 унаасын 1995-жылы туулган Бишкек шаарынын тургуну Б.Н. башкарып келе жаткан. Ал жолдун ортосунан бурулуш жасайм деп кырсыкка кабылган. Анын кесепетинен Lexus ES 300 унаасынын айдоочусу, андан тышкары 1995-жылы туулган Д.Н. жана Б.Б. аттуу 2 жүргүнчүсү каза болгон. Ал эми К.Б. аттуу жүргүнчү Чолпон-Ата шаарындагы оорукананын жандандыруу бөлүмүндө жатат", - дешкен мекемеден.

BMW Х7 унаасынын айдоочусу жана жүргүнчүсү жаракат алган эмес. Жол кырсыгы 7-июлда Бактуу-Долоноту айылына жакын жерде орун алган.