Мирбек Атабеков талкуу жараткан чыгармасынан кийин дагы жаңы ырын күйөрмандарына тартуулады

Кыргыз Республикасынын Эмгек сиңирген артисти Мирбек Атабеков жаңы чыгармасынын бет ачарын өткөрдү. Чыгарма ырчынын Ютубдагы каналына жүктөлгөндөн кийин катталуучуларынын саны 100 миңге жетти. "Жыргалымсың" аталышындагы чыгарманын үстүнөн көп убакыт иштедим деген ырчы буларга токтолду.

"Күйөрмандарыма "Бай болгом" деген чыгармамдан мурда ушул ырымды тартууламакмын. Бирок ал чыгарма шашылыш түрдө чыгып калды. "Жыргалымсың" аталышындагы ырдын биринчи аранжировкасы, андан кийин обону даяр болгон. Кийин Акбар Кубанычбеков экөөбүз текстин жаздык. Ыр жазылгандан кийин 2 ай анын үстүнөн иштедик. Чыгарманы толук иштеп чыгып Ютуб каналыма жүктөп, катталуучуларымдын саны 100 миңге жеткенде бет ачарын өткөрөм дегем. Сөзүмө туруп, ырымдын бет ачарын өткөрдүм. Чыгармамды каналыма жүктөгөндөн кийин 2 апта аралыгында 25 миң колдонуучу катталды. Эми кийинки ырымды каналыма катталгандардын саны 200 миңге жеткенде жүктөйм", - дейт.

Жакында эле Мирбек Атабеков күйөрмандарына "Бай болгом" чыгармасын тартуулаган. Ыр угармандар арасында дароо эле талкууга алынып, "мурдагы президент Алмазбек Атамбаевдин жана айрым саясатчылардын арманы" дешкен.