Жол кырсыгынан каза болгон бала окуган мектептин жетекчиси кызматынан бошотулду

9-июль күнү саат 09:00 чамасында Жайыл районунун Новониколаевка айылында Хонда Фит үлгүсүндөгү унааны 21 жаштагы айдоочу айдап бара жатып кырсыкка кабылган. Унаа 11 жаштагы баланы сүзүп, жабырлануучу "Тез жардам" кызматы келгенче окуя болгон жерден каза болуп калган.

Кийинчерээк окуучу мектепке эмгек практикасына бара жатып кырсыкка кабылганы маалым болгон.

Ал эми маркум билим алган Жайыл районундагы Новониколаевка мектебинин директору окуядан кийин иштен алынгандыгын Билим берүү жана илим министрлигинен кабарлашты.

Министрликтен Новониколаевка мектебинин директорун иштен алуу чечимин Жайыл райондук билим берүү бөлүмү чыгаргандыгын кошумчалашты.

"Мектептин директору окуу планды бузган. Анда окуучулардын эмгек практикасы каралган эмес, ал эми директор окуучуларды кээ бир иштерге тартууга буйрук берген" деп билдиришти министрликтен.

Бул факты Кылмыштардын жана жоруктардын бирдиктүү реестрине катталып, унаа айып короосуна токтотулду. Башка бардык тийиштүү иштер Жайыл РИИБи тарабынан аткарылууда.