Ошто укалоочу салон делинген жайда интимдик кызмат көрсөтүлүп келгени аныкталды

Ошто интимдик кызматты көрсөткөн көмүскө жай аныкталды. Аталган жай укалоочу салон деп ачылган. Бул тууралуу ИИМдин басма сөз кызматы билдирди.

Маалыматка ылайык, Ош ШИИБине укалоочу салон деп ачып, бирок ал жай сойкукана экени тууралуу маалыматтар келип түшкөн. Ошондой эле жергиликтүү тургундар да милицияга арыз менен кайрылышып, аталган жай сойкукана экени аныкталган.

Бул факты Кылмыштардын жана жоруктардын бирдиктүү реестрине катталып, териштирүү иштери башталган.

"Июнь айынын аягында аталган жайды милиция кызматкерлери текшерүүгө алышып, анда салондун ичинен кыз-келиндерди табышкан. Алар укалоонун бир канча түрүн жасап, алардын катарына эротикалык укалоо дагы бар экенин айтышкан. Бирок текшерүүдө укалоо жасай турган бир дагы үстөл табылган эмес. Мындан улам көмүскө жайда сойкулук кызматы уюштурулуп келгени аныкталган.

Аталган жайдан укук коргоо органдары 4 кыз-келинди кармап келишкен. Ал эми калгандары облустун ар кайсыл райондорунан келип иштеп жүргөндөрү белгилүү болгон. Милициянын бөлүмүнө алынып келген кыз-келиндердин бири көмүскө жайда сойкулук уюштурган деп шектелүүдө. Учурда бул иш сотко чейинки өндүрүшкө алынып, тергөө иштери башталды", - деп жазылат маалыматта.