Жалал-Абадда чарчап калган 2 жашар кызга жасалган экспертизанын жыйынтыгы чыкты

Жалал-Абадда оор абалда ооруканада жатып чарчап калган 2 жашар кызга жасалган экспертизанын жыйынтыгы чыкты. Бул тууралуу облустук милициядан билдиришти.

"Чыккан экспертизанын жыйынтыгында тергөө тарабынан коюлган суроолорго толук кандуу жооп болгон жок. Мындан улам комиссиялык түрдө ар тараптуу жана объективдүү жыйынтык алыш үчүн кайра Бишкек шаарына жөнөтүлдү. Учурда жообун күтүүдөбүз. Ал эми экспертизанын жөнөтүлгөнүнө 10 күн болду", - деди басма сөз кызматкери.

Окуянын чоо-жайы:

7-май күнү Сузак районундагы айылдардын биринен 2 жаштагы кыз оор абалда ооруканага келип түшкөнү белгилүү болгон. Бул окуя боюнча Жалал-Абад ОИИБи кылмыш ишин ачкан. Буга чейин кыздын абалы өтө оор деп бааланып келген. Анын апасы Орусияда иштеп жүргөн. Ал эми кичинекей кызды апасынын өгөй энеси карап жатканы айтылган. Кыздын атасы кыздарына келип кабар албай турганын кыздын апасы айтып чыккан. 20-майда оор абалда жаткан кыз чарчап калган.