Орусияда Леонид Маевский бизнесмендерди компромат менен коркутуп, 50 миллион доллар талап кылганы белгилүү болду

Мамлекеттик Думанын экс-депутаты Леонид Маевский "Альфа-банкынын" ээлери Михаил Фридман менен Пётр Авенди компромат менен коркутуп, алардан 50 миллион доллар талап кылганы белгилүү болду. Бул тууралуу орус басылмалары жазып чыгышты.

Леонид Маевскийдин ысымы Кыргыз коомчулугунда кеңири белгилүү. Ал экс-депутат Өмүрбек Текебаевдин үстүнөн алдамчылыкка айыптап арыз жазган.

2017-жылдын 25-февралында Кыргыз Республикасынын Башкы прокуратурасы тарабынан "Ата Мекен" фракциясынын лидери Өмүрбек Текебаевге "коррупция" жана "алдамчылык" беренелери боюнча кылмыш иши козголуп, ошол эле күнү УКМКнын Тергөө башкармалыгына өткөрүп берилген. 26-февралда козголгон кылмыш ишинин алкагында Текебаев менен мурдагы элчи Дүйшөнкул Чотонов камалган.

Башкы көзөмөл органдын берген маалыматы боюнча, аларга орусиялык ишкер Леонид Маевскийдин арызынын негизинде иш козголгон. Маевский өз арызында Текебаев "Мегаком" иши боюнча 1 миллион доллар алып, аны кайтарбай койгонун айткан.

Леонид Маевский 1999-2003-жылдар аралыгында Орусиянын Мамлекеттик Думасынын үчүнчү чакырылыштагы депутаты болгон.

16-июлда Жогорку Сотто Өмүрбек Текебаевдин иши жаңы ачылган жагдайлардан улам кайра каралат.