Бишкек-Балыкчы каттамынын жүргүнчүсү поезддеги абал боюнча нааразычылыгын билдирди

Бишкек-Балыкчы каттамынын жүргүнчүсү поезддеги абал боюнча нааразычылыгын айтты. Интернеттеги социалдык тармактардын бирине жарыяланган билдирүүдө поездге жүргүнчүлөр чыгып жатканда коштоп баруучу кызматкерлер жок болгонун белгилеген.

"12-июлда Бишкек-Балыкчы каттамы боюнча поездге отурганбыз. Күн ысык, отурганга мүмкүн эмес, көпчүлүгү кош бойлуулар, кичинекей балдары менен бара жаткандар бар. Поезд коштоочулар жүргүнчүлөр отуруп жаткан убакта жок болуп, поезд жыла баштаганда пайда болушту.

Билет алууга кезекке тургусу келбей дароо орундуктарга отуруп алгандарга билет сатып башташты. Жүргүнчүлөр нааразычылыгын айтып киришкенде калган жүргүнчүлөрдү текшербей коюшту. Ар бир станцияда көрүнүш улам начарлап кетти. Жүргүнчүлөрдүн арасында чет өлкөлүктөр да бар эле", - деген жаран өкмөткө нааразычылыгын билдирген.

SUPER.KG порталынын "ЭЛДИК КАБАР" бөлүмүнө байланышкан окурман жүргүнчүлөргө кассирлер билет жок экенин эскерткенине карабай айрымдары поездге чыгып кетишкенин билдирди.

"Бишкек-Балыкчы темир жол каттамы боюнча 12-июлда балдарыбызды лагерге жиберүү үчүн барганбыз. Вагондор алдын ала төлөнүп, лагерге барчу балдарга бөлүп беришкен. "Калган вагондорго билет сатылып бүттү, орун жок" деп кассадан кайра-кайра эскертип жатышты. Бирок ага карабай эле жүргүнчүлөр кыргызчылык кылып билетсиз чыгып алышты. Ырас, өздөрү билетсиз чыгып алгандан кийин кайра жаманатты кылбаса. 70 сом төлөп коюп, ыңгайлуу шартты талап кылышат. 70 сомго литр суу гана келет", - деп билдирди окурман.