Иттин этин жесе болобу? Түштүк Кореяда каршы болгондор жана колдогондор бир жерде митинг өткөрүштү

Түштүк Кореяда жаныбарларды коргоо боюнча топтун өкүлдөрү иттин этин азык катары колдонууга каршы митинг өткөрүштү. Алардын арасында Голливуд актрисасы Ким Бейсингер да болду. Алардан 10 метр алыстыкта фермерлер митингчилерге каршы акция өткөрүп, иттин этинен жасалган тамактардын дегустациясын уюштурушту. Бул тууралуу 13-июлда кореялык басылмалар жазып чыгышты.

Иттин макетин колго көтөрүп турган активисттер жаныбарларды коргоо боюнча мыйзам чегинде катаал чаралар көрүлбөгөнүн сынга алышты. Ал эми актриса Ким Бейсингер жаныбарларды коргоо тобуна Кореядагы атактууларды кошулууга чакырды. Жергиликтүү укук коргоо уюмдарынын маалыматына караганда, 2018-жылы жүргүзүлгөн сурамжылоодо Кореядагы жашоочулардын 46 пайызы иттин этин жегенге тыюу салууну колдошкон. Ал эми 18,5 пайызы каршы экенин билдиришкен.

Митингчилерден алыс эмес жерде иттин этин сатып ишкерлик кылгандар да акция өткөрүштү. Алар итти башка үй жаныбарлары катарында көрүү керектигин белгилешкен. Алардын айтымында, 70 миңге жакын адам иттин этин сатып жан багып келишет.