Ысык-Көлгө эс алууга барган Казак жараны изделүүдө. Ал ижарага скутер алып кеткен бойдон кайтып келген эмес

Ысык-Көл облусунда Казакстандын жараны изделүүдө. Бул тууралуу облустук милициядан билдиришти.

Маалыматка ылайык, 14-июль күнү болжол менен саат 21:30 чамасында Ысык-Көл РИИБине Алматы шаарынын тургуну арыз менен кайрылган. Арыздануучу "Алтын-Көл" пансионатында чогуу эс алып жүргөн 53 жаштагы досу саат 14:15 чамасында дайынсыз жоголгонун билдирген.

"Ыкчам тергөө тобу окуя болгон жерге барып, эс алуучулардын Ысык-Көлгө 13-июлда келишкенин аныкташкан. Ал эми 14-июлда изделип жаткан жаран ижарага скутер алып сүзүп кеткен боюнча кайтып келген эмес. Мындан улам анын досу көл жээгиндеги башка скутерлердин ээлери менен өз алдынча издөө иштерин жүргүзгөн. Бирок жыйынтык чыккан эмес. Учурда өзгөчө кырдаалдар бөлүмүнүн куткаруучулары жана милиция кызматкерлери издөө иштерин улантууда. Бул факты Ысык-Көл ОИИБинин электрондук журналына катталды", - деп билдирет басма сөз кызматы.