Буга чейин 7 жылга кесилген Жогорку Кеңештин экс-депутаты Музаффар Исаков үй камагына чыгарылды

7 жылга эркинен ажыратылган Жогорку Кеңештин экс-депутаты Музаффар Исаков үй камагына чыгарылды. Бул тууралуу бүгүн, 18-июлда облустук соттун басма сөз кызматынан билдиришти.

Буга чейин Жогорку Сот Музаффар Исаковдун ишин карап, аны кайрадан карап чыгуу өтүнүчү менен ишти Сузак райондук сотуна жөнөткөн.

Облустук соттон билдиришкендей, 15-июль күнү Сузак райондук соту экс-депутаттын ишин кайра карап чыгып, аны үй камагына чыгаруу боюнча жактоочунун өтүнүчүн канааттандырган.

"Соттун чечимине ылайык, айыпталуучуга карата колдонулган бөгөт коюу чарасы өзгөртүлүп, ага карата үй камагы түрүндөгү бөгөт коюу чарасы 15-сентябрга чейин узартылды", - деп билдиришти соттон.

Окуянын чоо жайы:

2017-жылдын 13-февралында башкы прокурор тарабынан Музаффар Исаковго карата "коррупция" беренеси боюнча кылмыш иши козголгон.

Маалыматка ылайык, Исаков Жалал-Абад облусунун Сузак районундагы Таш-Булак айыл өкмөтүнүн башчысы болуп турганда 315 мыйзамсыз токтом чыгарган. Ал 2010-2015-жылдар аралыгында райондук архитектура жана Мамлекеттик каттоо кызматкерлери менен жең ичинен сүйлөшүп алып 14,34 гектар айыл чарба багытындагы жерди жеке курулуш иштерин жүргүзүүгө берген деп айыпталууда.

Буга чейин Сузак райондук соту экс-депутат Музаффар Исаковду 7 жылга 3 жылдык сынак мөөнөтү менен шарттуу кесип, 5 жылдык мөөнөткө мамлекеттик кызматтарга иштөө укугунан ажыраткан. Башкы прокуратура экс-депутаттын мүлкүн мамлекетке чегерүү менен 12 жылга эркинен ажыратууну сураган болчу.