Жалал-Абадда мыкаачылык менен өлтүрүлгөн 7 жашар баланын өлүмүнө айыпталган 22 жаштагы жаран өмүр бою эркинен ажыратылды

Жалал-Абад облусунун Ноокен районунда мыкаачылык менен өлтүрүлгөн 7 жашар баланын өлүмү боюнча сот чечим чыгарды. Чечимди Ноокен райондук соту чыгарды. Анда 22 жаштагы айыпталуучу өмүр бою эркинен ажыратылды. Маалыматты Жалал-Абад облустук сотунун басма сөз кызматы тастыктады.

Маалыматка ылайык, чечим 1-июль күнү чыккан. Ошондой эле апелляциялык тартипте даттануу түшө элек.

Окуянын чоо-жайы:

Жалал-Абад облусундагы Ноокен районунун 22 жаштагы тургуну 7 жаштагы баланын өлүмүнө шектүү катары кармалган. Ага Кылмыш-жаза кодексинин "Адам уурдоо" жана "Адам өлтүрүү" беренеси менен кылмыш иши козголуп, соттун чечими менен Ош шаарындагы СИЗОго 2 айга камакка алынган.

Шектүү өз көрсөтмөсүндө баланы үйүнүн алдынан унаасына салып кетип, айдоо талаасына алып барып башка бир койгондо бала эс-учун жоготуп койгон. Андан кийин куру менен муунтуп өлтүрүп, ошол жерге көмүп салган. Экспертизанын жыйынтыгында да бала муунтуп өлтүрүлгөнү аныкталган.

Анын мындай кылмышка баруусуна баланын атасы экөөнүн ортосундагы чыр себеп болгон.