Шамиль Атаханов менчик клиникада дарыланууда

Мурдагы вице-премьер-министр Шамиль Атаханов учурда менчик клиникада дарыланууда. Мындай маалыматты Темир жол ооруканасынын башкы дарыгери Темирлан Султаналиев билдирди.

"Кечээ, 18-июлда саат 12:30да Шамиль Атахановду "Тез жардам" кызматы менен ооруканага алып келишкен. Келгенден кийин ага невропатологдор медициналык кароо жүргүзүштү. Атахановго мурда "Bicard" кардиохирургиялык клиникасынан операция жасалган. Туугандары ошол хирург менен байланышып, менчик клиникага "Тез жардам" кызматы менен алып кетишкен", - деди башкы дарыгер.

Ал эми аталган менчик клиникага байланышканыбызда Шамиль Атаханов интенсивдүү терапия бөлүмүндө жатканын билдиришти.

18-июлда ИИМдин тергөө кызматынын тергөөчүлөрү Атахановду суракка чакырышкан. Сурак учурунда экс-чиновник өзүн начар сезип, "Тез жардам" кызматы менен ооруканага жеткирилген.