Өзгөчө кырдаалдар министринин камакка алынган кеңешчисинин апасы жана аялы ооруп, балдары кароосуз калды

"Өзгөчө кырдаалдар министринин камакка алынган кеңешчиси Нурбек Жолборсов пара алган жок" деп SUPER.KG порталына айыпталуучунун адвокаты Мунарбек Турков билдирди.

Анын айтымында, министр Нурболот Мирзахмедовдун тапшырмасы менен ӨКМнин ички аудити тарабынан министрликтин алдындагы “Өзгөчө кырдаалдарга чара көрүү боюнча түндүк борбору” ишканасына аудиттик иликтөө жүргүзүлгөн. Бүгүнкү күндө бул аудит дагы деле жүрүп жатат.

"Натыйжада 2018-2019-жылдар аралыгында аталган ишкананын кассалык чыгыштоо ордерлеринде визасы басылбаган, жалпы 16 миллион сом накталай акча каражаты кассада жок болуп чыккан. Ага кошумча бир нече техникалар кароосуз калып, жарактан чыгарылган. Иликтөө иштеринин жыйынтыгы менен министрлик тарабынан аталган жагдайга мыйзам чегинде чара көрүү үчүн иш Аскер прокуратурасына өткөрүлгөн.

Тергөөнүн жүрүшүндө аталган ишкананын жетекчиси Асылбек Жусубалиев "жоголгон акчанын кайсы бир бөлүгүн кеңешчиге бергенмин" деп далилсиз көрсөтмө берген. Анын бул көрсөтмөсүнүн натыйжасында Нурбек Жолборсов кармалып отурат. Бирок Жусубалиевдин Нурбек Жолборсовго качан, кайсыл жерде, канча көлөмдө акча бергени жөнүндө бир дагы далили жок. Жолборсов бул ишке аралашканга ыйгарым укугу жок, ал министрге кеңеш гана бере алат", - деди Турков.

"Нурбек Жолборсовдун апасынын онкологиялык оорусу бар экен, аялы да ооруп жатат. 3 баласын караган эч ким жок болуп, аларды туугандары алып кетишти", - деп кошумчалады адвокат.

Бүгүн, 19-июлда Өзгөчө кырдаалдар министринин кеңешчиси Нурбек Жолборсов коррупцияга шектелип камакка алынганы белгилүү болгон.