Ак калпак менен чепкендин баркы кеттиби? Ольга Бузовага тартууланган улуттук кийимдер кызуу талкуу жаратты

Кечээ, 19-июлда Бишкекке орусиялык ырчы жана алып баруучу Ольга Бузова келген. Ал борбордогу лаунж бардын ачылышына карата уюштурулган концертке атайын конок катары чакырылган. Концерттен кийин уюштуруучулар ырчыга саймалуу чепкен, ак калпак жана камчы тартуулаган.

Ольга Бузова конок бөлмөсүнөн тартуулаган белектерди кийип көрүп, камчыны бир нече жолу жерге, столго дагы чаап көргөн. Видео социалдык тармактарга тез эле жайылып, талкууга алынды. Айрым интернет колдонуучулар маданиятыбыздын баркын кетирип жатканыбызды айтышса, айрымдары нормалдуу эле көрүнүш экенин жазышкан.

"Бузованын үстүнө чепкен жаап, башына калпак кийгизгени ашыкча деп ойлойм. Ага кийгизбеген күндө деле жанындагылар кыргыздын улуттук кийимдери барктуу экенин билишпейт. Алар мындай белекке татыктуу эмес!", "Белекке бере турган улуттук буюмдарыбыз көп. Аял кишиге чепкен жаап, калпак кийгизбей эле башка нерсе тартууласа болмок", "Акыркы мезгилде өзүн сыйлабаган кыргыздар көбөйдү. Улуттун, салттын баркын, баасын түшүрүп бүтүштү", "Бизде айымдарга жарашыктуу улуттук кийимдерибиз бар го. Дагы аял кишиге эркектин кийимин кийгизиптир, таң каласың. Камчыны эмнеге берди? Баш кийимибиздин баркы калбады. Камчы менен калпак оюнчук катары эле көрүп калды", - деген пикирлерин калтырышкан.

Ал эми айрымдары белек берүү уят эмес экенин, жакшы иш экенин айткан.

Буга чейин UFC`нин чемпиону, кыргыздан чыккан мушкер Валентина Шевченко Бишкекке келип күйөрмандары менен жолугушуу учурунда башына калпак кийгизилип, үстүнө чепкен жабылган. Андан кийин мушкер Ош шаарына барып күйөрмандары менен жолугушкан. Шаардагы жолугушуулардын биринде мушкерге кыргыздын улуттук кийимин, элечек кийгизишкен. Ага чейин шаар тургундары Шевченкого кемсел кийгизип, башына жоолук салып тосуп алган эле.