Ольга Бузовага берилген белектер боюнча уюштуруучулардын жообу

Социалдык тармактарда орусиялык ырчы, алып баруучу Ольга Бузовага берилген белектер кызуу талкууга алынды. Жаңы ачылган көңүл ачуучу жайдын жетекчиси Бегимай Ольга Бузовага калпак, чепкен жаппаганын SUPER.KG порталына айтып берди.

"Лаунж бардын ачылышына карата уюштурулган концертке Ольга Бузованы чакырганбыз. Ал Бишкекке жалгыз эмес продюсери менен кошо келген. Концерттин аягында ырчыга кыргыздын улуттук саймасы түшүрүлгөн айымдардын кемселин кийгиздик. Ал эми ак калпак, чепкен жана камчыны анын продюсерине тартуулаганбыз", - деп билдиришти.

Кечээ, 19-июлда Бишкекке орусиялык ырчы жана алып баруучу Ольга Бузова келген. Ал борбордогу лаунж бардын ачылышына карата уюштурулган концертке атайын конок катары чакырылган.

Ольга Бузова конок бөлмөсүнөн тартууланган белектерди кийип, камчыны бир нече жолу жерге, үстөлгө дагы чаап көргөн. Видео социалдык тармактарга тез эле жайылып, талкууга алынды.