Самара Каримова келиндүү болду. "Үлпөт тойду Лейлек, Ош жана Бишкек шаарында өткөрөбүз" дейт ырчы

Кыргыз Республикасынын Эмгек сиңирген артисти Самара Каримованын бир тууган иниси Сагынбек Каримов үйлөндү. Ырчы Сагынбек Каримов кечээ, 20-июлда сүйүктүүсү Азизага баш кошкон. Баш кошкон түгөйлөр тууралуу Самара Каримова буларды айтып берди.

"Сагынбек ата-энемди, бир туугандарымды, мени күттүрүп келген көкүрөк күчүгүбүз. Анын үйлөнүп, үйгө келин алып келгенин ата-энем көптөн бери күтүп жүргөн. Атам сыркоолоп жүргөндүктөн Сагынбекке келиндин чайын ичейин, неберелеримди көрөйүн, сүйлөшкөн кызың болсо айт деген. Инимдин сүйлөшүп жүргөнү бар экен. Куда, кудагыйлар жолугуп, сүйлөшүп, каада-салт менен келинди алдык. Эң негизгиси келинибиз акжолтой, кайрымдуу, эл мактаган, көп балалуу бүлө болсун.

Келинибиз Азиза Баткенден болот. Жашы 20да, кесиби боюнча мугалим. Ал эми Сагынбек 21 жашта, музыкант. Экөө тең Бишкек шаарындагы жогорку окуу жайларда билим алышат.

Кудайым буюрса, 30-июлда Лейлектеги тойканалардын биринде үлпөт той өткөрөбүз. Атамдын туугандары, достору, катыштарынын көбү Ошто, Бишкекте. Сагынбектин дагы достору көп. Атамдын сунушу менен катыштардын баарын Лейлекке чакырбай эле үлпөт тойду өзүнчө өткөрөлү деп жатабыз. 21-августта Ошто, 26-августта Бишкек шаарында үлпөт той өткөрөбүз", - деди ал.