Бишкекте дрифт боюнча мелдеште айдоочу унааны башкара албай сүзүп кеткендердин ичинен 2 Кытай жараны ооруканага жаткырылды

Бишкекте дрифт боюнча мелдеште айдоочу унааны башкара албай сүзүп кеткен 6 жарандын ичинен 2 Кытай жараны ооруканага жаткырылды. Бул тууралуу бүгүн, 22-июлда SUPER.KG порталына Бишкек шаардык травматология жана ортопедия илим изилдөө борборунун башкы дарыгери Алмаз Кубатбеков билдирди.

Маалыматка ылайык, кырсык кечээ саат 13:00 чамасында орун алган.

"Кырсыктын кесепетинен жабыркаган 6 адамдын ичинен бешөө ооруканага кайрылган, анын экөө амбулатордук жардам алып үйлөрүнө жиберилген. Калгандарына тиешелүү медициналык жардам көрсөтүлгөн. Ал эми эки Кытай жаранынын баш мээси чайкалып, биринин акыреги сынып кеткен. Учурда алар дарыгерлердин көзөмөлүндө, экөөнүн тең абалы канааттандырарлык", - деди Кубатбеков.

Окуянын чоо-жайына кайрылсак:

Кечээ Бишкектеги "Жеңиш" аянтында өткөн дрифт боюнча мелдеште айдоочу унааны башкара албай көрүүчүлөрдү сүзүп кеткен. Кырсыктын кесепетинен 6 адам жабыркаган болчу. Анда Тойота Марк 2 үлгүсүндөгү унааны башкарган 32 жаштагы Л.А. Ибраимов көчөсүнөн Фрунзе көчөсүнө бурулганда рулду башкара албай жолдун четиндеги адамдарды сүзүп алган.