Концерттен жок же акчадан жок. Москвада Орус жараны элди алдап кетти

Орусиянын Москва шаарындагы "CROCUS CITY" концерттик залында Кыргыз эстрада ырчыларынын жана күлкү жаратуучуларынын катышуусунда концерт 20-июлга белгиленген. Бирок аталган концерт болбой калганын, билеттерди сатып алгандардын акчасы кайтарылбай жатканын социалдык тармактын колдонуучусу жазып чыккан.

Интернет колдонуучунун айтымында, концерт ушул жылдын 22-июнуна белгиленген. Бирок уюштуруучу Адина Турдубаева концертти белгисиз себептерден улам 20-июлга жылдырган.

"1 ай бою күткөн концерт белгиленген күнү дагы өтпөй калды. Адина Турдубаева залдын ижара акысына жетиштүү көлөмдөгү акча чогулбай калгандыктан концертти токтотконун, орун сатып алгандардын акчасын август айында кайтарып берерин айткан. Эл ага ишенбей укук коргоо органдарына арыз менен кайрылган. Алдын ала маалыматтар боюнча 3 миңге жакын билет сатылган. Бир билеттин баасы 2 миң рублдан жогору болгон. Концертте оюндар ойнотулуп, 2 унаа жана башка түрдүү белектер берилет деп элди алдаган", - деп жазган.

Бул окуя боюнча Кыргыз өлкөсүнүн Орусиядагы элчилиги билдирүү жасады.

"Сатира жана юмор кечеси үстүбүздөгү жылдын 22-июнуна пландаштырылып, белгисиз себептер менен 20-июлга жылдырылган. Тилекке каршы, бул күнү да концерт өткөн эмес.

Элдин нааразычылыгы иш-чараны уюштуруучулардын жоопкерчиликсиз мамилесинен улам жаралган. Уюштуруучу Адина Турдубаева Орус жараны болгондуктан, Орусиянын тийиштүү мыйзамдарына ылайык жоопкерчиликке тартылат", - дейт маалымат кызматынан.