"Манас" эл аралык аэропортунун ондон ашык кызматкери түшкү тамактануудан кийин ууланганы белгилүү болду

"Манас" эл аралык аэропортунун ондон ашык кызматкери түшкү тамактануудан кийин ууланганын аба майдандын басма сөз кызматкери билдирди.

Маалыматка ылайык, уулангандар жеке менчик "Экипаж" ашканасынан тамактанышкан.

"Аэропорт бул окуядан кийин Санитардык-эпидемиологиялык көзөмөл борборуна кайрылган. Алар аталган жайга эки жолу текшерүү жүргүзүшкөн. Мындан улам алардын чыгарган жыйынтыгынан кийин гана ашканага чара көрүлөт. Ал эми аэропортто иштеген кызматкерлер кайсы ашканадан тамактана турганын өздөрү тандашат", - деп билдирет басма сөз кызматы.

Ал эми Санитардык-эпидемиологиялык көзөмөл борбору кызматкерлер ашпозчулар өздөрүнүн рецепти менен жасаган куксиден улам ууланышканын билдирген.

Буга чейин Бишкектеги Жугуштуу оорулар боюнча республикалык ооруканасына "Манас" эл аралык аэропортунун кызматкерлери уулангандарын айтып кайрылышкан.