Эл аралык уюм: "Супер-Инфого" каршы салык мыйзамынын талаптарын текшерүү иши "ЖМКга кысым көрсөтүү" деп эсептелген"

Кыргыз өлкөсүндө журналист, жарандык активисттер жана укук коргоочуларга каршы соттук процесстер, кол салуулар жана куугунтуктоо иштери дале орун алууда. Бул тууралуу маалымат Адам укуктарын коргоо боюнча эл аралык өнөктөштүк уюмунун расмий сайтына жарыяланды.

Анда АКШнын мамлекеттик департаментинин 2018-жылдагы отчётунда Кыргыз өлкөсүндө адам укуктарын коргоо жаатында жакшы жакка өзгөрүүлөр тууралуу айтылганы менен, көйгөйлөр дале бар экени белгиленген.

Анын ичинде “Супер-Инфо” гезитине мамлекеттик тескөөчү органдар тарабынан чабуул жасалганы да көрсөтүлгөн.

"Буга чейин "Монитор" сайтында (жарандык коом глобалдык альянсы) маалымдалгандай, Экономикалык кылмыштуулукка каршы күрөшүү кызматы "Супер-Инфого" каршы салык мыйзамынын талаптарын текшерүү ишин жүргүзгөн. Ал иш "ЖМКга кысым көрсөтүү" деп эсептелген. Бишкектеги Биринчи Май райондук соту аталган кызматтын салык мыйзамынын талаптарын текшерүү боюнча эки токтомун жокко чыгарган. Экономикалык кылмыштуулукка каршы күрөшүү кызматы апелляциялык арыз менен кайрылып, сот кайра бул ишти карап чыгып ЖМКнын пайдасына чечкен", - деп айтылат эл аралык уюмдун маалыматында.