Премьер-министр: "Сентябрь айынан тарта мугалимдердин айлыгы көтөрүлөт"

"Айлык маяналарды жогорулатуу - бул өкмөттүн жоопкерчилиги" деп кечээ, 24-июлда өкмөттүн жыйынында премьер-министр Мухаммедкалый Абылгазиев билдирди.

Премьер-министрдин айтымында, 2008-жылдан бери көтөрүлбөй келе жаткан Улуттук илимдер академиясынын кызматкерлеринин айлык маянасы 30 пайызга жогорулады. "Мамлекеттик кадр кызматынын айлык маянасы көтөрүлдү. Спорт машыктыруучуларынын эмгек акысы 50 пайызга жогорулады. 1-сентябрдан тарта мугалимдердин айлыгы, 1-октябрдан баштап пенсиялар көтөрүлөт", - дейт өкмөт башчы.

Ошону менен катар эле Абылгазиев президент тарабынан 2 жыл катары менен "Аймактарды өнүктүрүү жылы" деп жарыяланышы региондордун өнүгүшүнө жакшы түрткү болгонун айтты. "Жаштар арасында патриоттуулук сезимдери менен кичи мекендерине жардам берүү демилгелери да көбөйүп бара жатат. 2019-жылы региондордогу бизнес-долбоорлорду колдоо жана жаңы жумушчу орундарын түзүү максатында мамлекеттик бюджетте 2 миллиард сом каражат каралган. Учурда приоритеттүү бизнес-долбоорлорду тандап алуу, механизмдерин иштеп чыгуу боюнча өкмөттүк комиссия бекитилди. Аймактарда ишкерликти тейлөөчү борборлор ачылды. Жергиликтүү ишканалардын жана жарандардын жеке демилгесин баса белгилеп кетким келет. Алар аймактардын экономикасына 6 миллиард 3 миллион сом каражат салып, 9 миңден ашык туруктуу жумушчу орундарын түздү", - деди Мухаммедкалый Абылгазиев.