"Бекер деле бермекпиз..." Өзгөндө жаңы төрөлгөн ымыркайын сатууга аракеттенген жарандар мындай кадамга эмне үчүн барганын айтты

Өзгөндө жаңы төрөлгөн кызын 30 миң сомго сатууга аракеттенген 2 жаран бул кадамга ымыркайы кереги жок болгону үчүн барышкан. Бул тууралуу SUPER.KG порталына шаардык милициядан билдиришти.

Маалыматка ылайык, тун наристесин сатууга аракеттенген жарандар расмий түрдө үйлөнгөн эмес.

"Оор кылмышка шектелген 22 жаштагы Өзгөн районунун жана 24 жаштагы Баткендин тургуну сурак учурунда ымыркайынын кереги жок экенин билдиришкен. Алардын берген көрсөтмөсүнө ылайык, кызды багып ала турган адамдарга бекер эле беришмек. Бирок алар ыраазычылык катары 30 миң сом сунуштаганын билдиришкен. Учурда кылмышка шектүүлөр соттун чечими менен үй камагына чыгарылган", - деп билдиришти милициядан.

Буга чейин 15-июль күнү 25-июнда төрөлгөн ымыркайды сатууга аракет кылган жарандын кармалышы боюнча айтылган. Учурда ымыркай тиешелүү кызматтын кызматкерлери тарабынан алынып, реабилитациялык борбордо каралууда. Соттун чечими менен кылмышка шектүү ата-эне 15-сентябрга чейин үй камагына чыгарылган.