Батуттун ордуна жууркандар, баш айланганча селкинчек тепкен күндөр. Балалыкты эске салган ирандык сүрөтчүнүн эмгектери

Улуулардан "Эх! Биздин убакта 1 сомго 100 ширеңке келчү эле" деген сөздү угуп калдыңыз беле? Алар Советтер Союзу мезгилиндеги окуяларды жана жаңы өзгөрүүлөр тууралуу айтып калышчу. Убакыт менен кошо заман да өзгөрөт эмеспи. Учурда айылдарда көчөдө ойноп жүргөн балдар тобун кезиктирүү да кыйын. Замандын өзгөрүүсү, техника жана технологиянын өнүгүүсүнө байланыштуу кичинекей балдардын кызыгуусу да азыр башкача.

"Эх! Биздин убакта планшет деген нерсе жок эле" дей турган маал да келип калды өңдөнөт. Көпчүлүктүн балалыгын эске салган сүрөттөрдү ирандык Али Мири тартып келет. Ал 1975-жылы Мешхед шаарында туулган. Жаш кезинен эле сүрөт тартуу менен алектенип келгенин айтканы бар.

"Бактылуу жашоо - бул ар бир баланын укугу. Мен өз аудиториям үчүн тарткан сүрөттөрүм, жазган баяндарым аркылуу жагымдуу дүйнөнү жаратканга аракет кылам. Кайсы бир күнү бардык адамдар кичинекей балдар сыяктуу эле бактылуу жашап калышын кыялданам. Сүрөтчү катары бул багытта бүт аракетимди жасайм", - дейт Али Мири.

1. Жууркан-төшөнчүлөрдү батутка айланткан күндөр.

2. Үйдүн ичиндеги чакан үйдү куруп алчубуз.

3. Баш айланганча селкинчек тепчүбүз.

4. Энелер килем жууган учурду аквапаркка айлантчубуз.

5. Бир туугандар менен чогуу телевизор көрчү элек. Азыр ар биринде смартфон бар эмеспи...

6. Мешке суу чачып буу чыгарган кызыктуу көрүнчү.

7. Мөмө-жемиштерди биргелешип терчүбүз.

8. Чоң аталарыбызга массаж жасап берген күндөрүбүз болгон.

9. Энелер кийим тигип жатканда жардам берчүбүз.

10. Туугандар баарыбыз бирге короодо же сөрүдө (топчанда) отуруп тамактанган учур.