Салык кызматы жыл башынан тарта 15 кызматкерин жазалады

Мамлекеттик салык кызматы жыл башынан бери жарандардын кайрылууларынын жыйынтыгы боюнча 15 кызматкерин жазалады. Бул тууралуу бүгүн, 29-июлда аталган кызматтын басма сөз кызматы билдирди.

Маалымат боюнча, Мамлекеттик салык кызматына 6 айда жарандардан жана юридикалык жактардан 86 кайрылуу жана даттануу келип түшкөн. "Алардын ичинен 23 билдирүү электрондук почта аркылуу, жазуу жүзүндө 30, ишеним телефонуна 31 жана массалык маалымат каражаттары аркылуу 2 билдирүү болгон. Келип түшкөн арыздардын 35и салык органдарынын кызматкерлеринин мыйзамсыз иш аракеттерине тийиштүү болсо, 20сы ишкерлердин салык мыйзамдарынын ченемдерин сактабагандыгы, ал эми калганы ар кандай маселелер боюнча болгон. Бардык кайрылуулар Кыргыз Республикасынын мыйзамдарына ылайык каралган. Салык органдарынын кызматкерлеринин мыйзамсыз иш аракеттерине тийиштүү кызматтык иликтөөнүн жүрүшүндө 13 арыз боюнча факты ырасталган эмес жана он бири боюнча ырасталган, жарым-жартылай ырасталганы бирөө, ал эми 10у карап чыгуу стадиясында турат. Кабыл алынган тийиштүү чаралардын жыйынтыгында ар кандай жаза чарасы колдонулган. 2 адам кызматтан бошотулса, 3 кызматкерге карата катуу сөгүш, экөөнө сөгүш жарыяланып, дагы алтооно эскертүү жана 5 кызматкерге катуу эскертүү берилген. Салык төлөөчүлөр тарабынан салык мыйзамын бузуулар боюнча 20 кайрылуунун ичинен текшерүүнүн жүрүшүндө 9 билдирүү боюнча фактылар тастыкталды. 6 арыз боюнча фактылар тастыкталган жок, кароо стадиясында 5 факты бар", - деп жазылат маалыматта.