Жактоочу: "Транспорт министринин мурдагы орун басарына чыккан чечимге макул эмеспиз, облустук сотко кайрылабыз"

Бүгүн, 30-июлда Бишкектеги Биринчи Май райондук соту ири көлөмдөгү пара алган деп айыпталып жаткан Транспорт жана жолдор министринин мурдагы орун басары Азимкан Жусубалиевди 14 жылга эркинен ажыратты.

Жусубалиевдин жактоочусу Жыргалбек Бабаев соттун чыгарган чечимине макул эместигин билдирди.

Анын айтымында, 10 күндүн ичинде облустук сотко кайрыларын айтты. "Биз тараптан келтирген фактылардын бири дагы эске алынган жок. Бул чечимге макул эмеспиз. Ошондуктан облустук сотко кайрылабыз", - деди Бабаев.

Окуянын чоо-жайы:

Транспорт жана жолдор министринин орун басары Азимкан Жусубалиев өткөн жылдын декабрь айында 50 миң доллар пара алып жаткан жеринен кармалганын УКМК билдирген. УКМКнын маалыматына ылайык, аткаминер чет өлкөлүк компаниялардын биринин кызыкчылыгын көздөп тендерде алардын пайдасына чечим чыгаруу үчүн “шапканы” 520 миң доллар деп баалап, 120 миң долларын ортомчулук кылган туугандары аркылуу алган.

Бул окуянын айынан Транспорт жана жолдор министри Жамшитбек Калилов президент тарабынан катуу сынга алынган соң, кызматтан кеткен.

Азимкан Жусубалиевдин пара менен кармалышы боюнча бардык кабарларды окуу үчүн бул шилтемени басыңыз.