ЖАМК: "Аида Салянова Кыргыз өлкөсүндө операция жасатуудан баш тартууда"

Аида Салянованын абалы канааттандырарлык. Бул тууралуу бүгүн, 31-июлда ЖАМКтын басма сөз кызматы маалымат таратты.

Буга чейин экс-прокурордун тууганы ал тез арада операция жасатууга муктаж экенин билдирип, анын абалы оорлошуп жатканын баса белгилеген.

"Аида Салянова Бишкектеги СИЗО-1де. Ал дарыгерлердин көзөмөлүндө болууда. Дарыгерлердин айтымында, аны ооруканага жаткыруунун кажети жок, кароо учурунда анын абалы канааттандырарлык болгон. ЖАМКтын дарыгерлери операция жасоо боюнча сүйлөшүү жүргүзгөн, бирок Салянова Кыргыз өлкөсүндө операция жасатуудан баш тартууда", - деп айтылат маалыматта.

21-июнда Биринчи Май райондук соту кримтөбөл Азиз Батукаевдин бошотулушу боюнча экс-прокурор Аида Салянованы 26-августка чейин камакта калтыруу чечимин чыгарган. Ал ушул жылдын 3-июнунда кармалган.