УКМК: "Токой чарба агенттигинин башчысы менен анын жардамчысы пара алып жатып кармалды"

Курчап турган чөйрөнү коргоо жана токой чарба мамлекеттик агенттигинин башчысы Абдыкалык Рустамов менен анын жардамчысы А.И. пара алып жатып кармалышты. Бул тууралуу бүгүн, 31-июлда УКМКнын басма сөз кызматы билдирди.

Маалыматка ылайык, кечээ, 30-июлда алар 2 миң доллар алып жаткан учурда кармалган. "Агенттиктин башчысы жана анын жардамчысы чет элдик жарандан Ысык-Көл токой чарбасында Ананьево айылындагы жер фондунан 5 гектар жер участогун берүүдө оң чечим чыгарганы үчүн пара талап кылган. Тинтүү учурунда алардын ар биринен 1 миң доллар акча табылган. Бул факты Кылмыштардын жана жоруктардын бирдиктүү реестрине "пара алуу" беренеси менен катталып, сотко чейинки өндүрүшкө алынды", - деп жазылат маалыматта.