Кыргыз клубдарында ойногон 4 футболчу өмүр бою футболдон четтетилди

Азия футбол конфедерациясы “Дордой” жана “Алай” клубдарынын 4 оюнчусун өмүр бою футболдон четтетти.

АФКнын дисциплинардык жана этикалык кодексин бузгандыгы үчүн Кыргыз улуттук курама командасынын жана “Дордой” клубунун мурунку оюнчусу Курсанбек Шератовго футболго байланыштуу бардык иш-чараларга катышууга тыюу салынды. Шератов 2017-жылы АФК кубогунун алкагында "Дордой" командасы катышкан оюндарда сүйлөшүүлөргө баргандыгы үчүн күнөөлүү деп табылды. Ошондой эле бул оюндарда футболчу букмекердик ишкердикти колдогондугу боюнча да айыпталды.

"Алайдын" мурдагы жана учурдагы оюнчулары Ильяз Алимов, Абдуазиз Махкамов жана Владимир Веревкин 2017-2018-жылдары АФК кубогунда "Алай" командасында ойноп жүргөндө сүйлөшүп алууларга баргандыгы үчүн күнөөлүү деп табылышты.

Ушул жылдын июль айында “Дордой” клубу себебин ачыкка чыгарбай Курсанбек Шератов менен келишимди жокко чыгарган. Ал эми бул сезондун башында Ильяз Алимов “Алайдан” “Нефтчи” командасына өткөн. Абдузазиз Махкамов учурда Оштун “Алай” клубунун оюнчусу.

2017-жылы АФК кубогунда “Дордой” менен “Алай” бир тайпада ойношкон, бирок эки клуб тең плей-оффтук баскычка чыга алышкан эмес.