Президент: "Орусияда эмгектенип жаткан биздин жарандарыбыздын акыбалы бир топ жакшырды"

"Азыркы кезде көптөгөн мекендештерибиз чет өлкөлөрдө жакшы ийгиликтерге жетишип, түпкү мекенинде маанилүү экономикалык, социалдык долбоорлорду ишке ашырууга кирише башташты" деп бүгүн, 2-августта президент Сооронбай Жээнбеков чет өлкөдөгү мекендештер менен байланыштар боюнча кеңештин биринчи жыйналышында айтты.

Мамлекет башчысы Кыргыз жарандары бир топ өлкөлөрдө көпчүлүгү Орусияда окуп, иштеп жатышканын белгиледи.

"Орусияда эмгектенип жаткан биздин жарандарыбыздын акыбалы бир топ жакшырды. Орусиянын президенти Владимир Путиндин жеке колдоосунда жарандарыбызга миграциялык жеңилдетүү жана "кара тизмеден“ чыгаруу мүмкүнчүлүгү берилди. Ошондой эле, Кыргыз Республикасынын айдоочулук күбөлүгү менен Орусияда иштөөгө шарт түзүлдү. Орусиядагы мекендештерибизге көрсөткөн жеке колдоосу үчүн Владимир Владимирович Путинге мүмкүнчүлүктөн пайдаланып дагы бир ирет ыраазычылыгымды билдирип кетем", - деп баса белгиледи мамлекет башчысы.

Президент акыркы жылдары коңшу өлкөлөр менен анын ичинде Орусия, Казакстан жана Өзбекстан менен кызматташуунун бардык багыттарында активдүү динамика байкалып, тыгыз жана ишенимдүү саясий диалог калыптанганын кошумчалады.

Сооронбай Жээнбеков бардык айтылган маселелер боюнча тиешелүү жумуш башталып, анын ишке ашырылышы мамлекет башчысынын жеке көзөмөлүндө болорун белгиледи.

Ошондой эле, ал жарандарды чет мамлекеттерде окуп келгендерди дагы жумушка орноштурууда таза жана ачык-айкын атаандаштыкты түзүүнүн маанисин белгиледи.

"Биз жумушка орноштуруунун таза системасын түзүшүбүз керек. Жаңы мыйзамдарга ылайык, мамлекеттик же муниципалдык кызматтагы бош кызмат орундары жөнүндө маалымат Мамлекеттик кадр кызматынын ачык булактарында жарыяланат" деди мамлекет башчысы.