Кыргыз муфтийи Максатбек Токтомушев Мекке шаарында ажылыкты уюштуруу иштери менен таанышты

Кыргыз мусулмандарынын муфтийи Максатбек Токтомушев Мекке шаарындагы ажылыкты уюштуруу штабынын мүчөлөрү менен жолугушуп, ажылыктын жүрүшү боюнча жеринде таанышты. Бул тууралуу Кыргыз мусулмандарынын дин башкармалыгы билдирет.

"Штаб кызматкерлери менен болгон жолугушууда муфтий ажылар үчүн кызмат кылуу жоопкерчиликтүү иш экендигин айтып, быйылкы жылдагы ажылык ишинде Сауд Арабия падышачылыгынын ажылык министрлиги койгон талаптардын бардыгы аткарылышы керектигин билдирди. Муну менен катар штаб өкүлдөрүн ажылыкты жогорку деңгээлде уюштуруу керектигин айтып, ажыларга коопсуздук, санитардык, Мина, Арафат жана Муздалифа өрөөндөрүнө көчүү эрежелерин, тартиптерин ажыларга жакшылап түшүндүрүү керектигин билдирди. Ошондой эле муфтий ажылардын коопсуздугуна көңүл буруп, аларга жолдо жүрүү эрежелерин, Мина өрөөнүндө өрт коопсуздугун алдын алуу боюнча атайын түшүндүрүү иштерин байма-бай жүргүзүү керектигин билдирди", - деп айтылат маалыматта.