Өкмөт Ирак жана Сириядан балдарды кайтарып келүү боюнча иштерди жүргүзүүдө

Өкмөт Ирак жана Сирияда жүргөн Кыргыз Республикасынын жараны болгон балдарды кайтарып келүү боюнча иштерди жүргүзүүдө. Бул тууралуу бүгүн, 5-августта өкмөттүн басма сөз кызматынан билдиришти.

Маалыматка ылайык, Сириянын "Качкындар үчүн курд лагерлеринде" кармалып жаткан жана Ирактын түзөтүү мекемелеринде жаза мөөнөттөрүн өтөп жаткан Кыргыз жарандарын кайтарып келүү боюнча вице-премьер-министр Жеңиш Разаковдун жетекчилигинин астында тиешелүү жумуштар аткарылып жатат.

Учурда мекемелер аралык жумушчу топ түзүлгөн. Ирактын мыйзамдарына ылайык, Кыргыз жарандарынын балдары визалык режимди бузгандыгына байланыштуу айып төлөө маселесин чечүү үчүн кыргыз тараптан финансылык каражаттар такталды. Бул маселе өкмөттүн аппаратында каралып жатат.

Өкмөт тарабынан тиешелүү жумуштар жүргүзүлүп, бул маселе премьер-министр Мухаммедкалый Абылгазиевдин жеке көзөмөлүндө турат.