Ошто Ленин чокусунан түшүп келе жатып каза болгон туристтин сүрөтү жарыяланды. Ал Орусиянын Ички иштер министрлигинде иштеген

Ошто Чоң-Алай районундагы Ленин чокусуна чыгып, кайра түшүп келе жатканда каза болгон турист Орусиянын Ички иштер министрлигинде иштегени маалым болду. 45 жаштагы Иван Иванов альпинизм менен алектенип жүргөнүн орус басылмалары жазып чыгышты.

Маалым болгондой, генерал эмгек өргүүсүн алып, Ленин чокусуна чыгуу үчүн Кыргыз жергесине келген. Ал чокудан түшүп келе жатканда каза болгон.

Окуянын чоо-жайы:

27-июль күнү орусиялык жаран Ленин чокусунан түшүп келе жатып, 5 миң метр бийиктикке келгенде байланышка чыгып, ошол бойдон кайра байланышка чыккан эмес. Ошондон бери ал дайынсыз болуп изделип жаткан. Турист "Горы Азии” туристтик фирмасында камсыздандырылган.

30-июлда саат 17:30 чамасында 6300 метр бийиктикте туристке таандык сумка жана визитка табылган. Ал эми 4-августта "Ак-Сай-Тревел" туристтик компаниясынын альпинисттери 6200 метр бийиктиктен маркумдун жансыз денесин табышкан.